नमस्कार,
मी श्री. चंदू छगन गवळे म. ए. सो. रेणावीकर माध्यमिक विद्यालयाचा नूतन मुख्याध्यापक, या नात्याने मनोगत व्यक्त करताना मला विशेष आनंद होत आहे.
महाराष्ट्र एज्युकेशन सोसायटीच्या विविध शाखांमध्ये सेवेच्या ३१ वर्षीय प्रदीर्घ अनुभवानंतर अहिल्यानगरच्या प्रशालेत मुख्याध्यापक पदाची जबाबदारी स्वीकारताना या प्रशालेची गुणवत्ता पूर्ण परंपरा मला माहित होती अनुभवी शिक्षक वर्ग शिक्षकेतर कर्मचारी वर्ग तसेच विद्यालयामध्ये विद्यार्थ्यांच्या सर्वांगीण विकासासाठी सज्ज असणारे भव्य क्रीडांगण, ग्रंथालय, संगणक कक्ष, समुपदेशन कक्ष, अटल टिंकरिंग लॅब सारखी इनोव्हेटिव्ह लॅब अशा सर्व भौतिक सुविधांनी शाळा सज्ज आहे.
शिक्षक पालक यांचे उत्तम सहकार्य, त्याचप्रमाणे शाला समितीचे अध्यक्ष मा. श्री. विजय भालेराव आणि महामात्र मा. डॉ. श्री. उमेश बिबवे सर यांचे उत्तम मार्गदर्शन यामुळे शाळेची प्रगती उत्तरोत्तर चढती राहील आणि त्यासाठी माझे प्रयत्न असतील.
ही प्रशाला एक उत्तम उपक्रमशील प्रशाला म्हणून प्रसिद्ध आहे प्रशालेमध्ये विविध कार्यक्रमांची सतत रेलचेल असते. सर्व दिनविशेष जसे शिक्षक दिन, हिंदी दिन, मराठी दिन, विज्ञान दिन, संस्कृती विविध मान्यवरांच्या जयंती, क्रीडा स्पर्धा, क्षेत्रभेटी, सहली, स्नेहसंमेलन यासारखे उपक्रमांमधून विद्यार्थी घडवले जातात पर्यावरण पूरक आणि स्वच्छ सुंदर शाळा या अभियानात शाळा सतत सहभाग घेत असते.
होऊ आम्ही उतराई, सामाजिक बांधिलकीचा प्रकल्प हेही शाळेचे एक अनोखे वैशिष्ट्य आहे. यामध्ये विद्यार्थी आपल्या खाऊच्या बचतीतील पैशातून वंचितांची दिवाळी साजरी करण्याकरता वस्तू आणि खाऊचे दान करतात. अशा उपक्रमांच्या माध्यमातून विद्यार्थ्यांमध्ये सामाजिक बांधिलकीचे भान जागृत करण्याचा प्रयत्न शाळा करत असते.
ग्रंथ प्रदर्शन, रांगोळी प्रदर्शन, पोस्टर प्रदर्शन, फूड फेस्टिवल या माध्यमातून विद्यार्थ्यांच्या कल्पनाशक्तीला वाव देण्याचाही प्रयत्न केला जातो.
शाळेच्या विकासाचा चढता आलेख असाच कायम राहील यासाठी आपल्या सर्वांचे सहकार्य मिळत आहे यासाठी आपल्या सर्वांचे शतशः आभार !!!
श्री.चंदू गवळे
म.ए.सो. रेणावीकर माध्यमिक विद्यालय (मुख्याध्यापक)